Иван Александров
Киирии тыл
Буойун окуопаттан быыс булан суруйа охсон ыыппыт
хоһооно миэхэ кэлбитэ…
Көрүүй харахтарбын, аны кэлэн кистээбэппин,
Туманнаах эйгэ кытылыгар үктэммэппин…
Ханна киирэн тимирэ сыспыппын сэрэйбэккин,
Тыыннаах таҕыстым уот будулҕантан,
Эн, күн мичээргинэн көмүскэнэн…
Эдэр саас сырыыларын оһорбоккун харах уутунан,
Ол ааспыт барыта сүрэх түгэҕэр түстэҕэ…
Умса туттан турума, барыттан бары куттанан!!!
Мин кэтэһэбин ол түгэни…
5 армия, 60 биригээдэ, рота Шторм.
Стручков Василий, позывнойа Василек. Верхоянскай.
Буойун элбэх сүтүктээх штурмтан тыыннаах тахсан олорон тапталлааҕар анаан суруйбут курдук. Бу быһа тардыы хоһоон кинигэбинэн сүппэккэ хаһан эрэ баҕар анаммыт киһитигэр тиийиэ эбэтэр уол бэйэтэ тиийэн тыыннаах тылларынан этиэ диэн эрэнэ хаалабын.
Төһө элбэх саха уола маннык ситэ этиллибэтэх тыллары иһигэр илдьэ сылдьара буолуой?…
Сахабыт эр дьонун бу сэриигэ оҥорор хорсун быһыыларын кэпсээн гынан сахалар бэйэбит суруйан таһаарбатахпытына ким суруйуой? Өлүү- сүтүү элбэҕин, балаһыанньа ыараханын билэ-билэ бара турар сахабыт дьонун барыларын геройдар курдук көрөбүн. Ким эрэ ол ыарахан кэмнэрин, – Маннык буолан ааспыта, биһиги тулуйбуппут- диэн үйэтитээри, историяҕа хааллараары кэпсиир, ким эрэ кэпсээбэт.
Кэпсээҥ уолаттар, кэпсээҥ… искитигэр тута сылдьымаҥ…
Күндү ааҕааччым, эн, бу кинигэбин арыйаат тута сэрии алдьархайыгар киирэн кэлбэтиҥ курдук үөрэтэрдии, көрдөөх кэпсээннэртэн саҕалаатым.
Уйбаан Александров
