Петр Федотович Кобельянов – Үөттээх Уола 1938 с. уруккутта Таатта, билиҥҥитэ Томпо улууһугар Кириэс-Халдьаайы сэлиэнньэтигэр төрөөбүтэ. Мелодист, самодеятельнай композитор, СР культуратын туйгуна, педагогическай үлэ бэтэрээнэ П.Ф. Кобельянов 1968 сыллаахха Дьокуускайдааҕы музыкальнай училище народнай отделениетын баян кылааһын бүтэрбитэ. Училище кэнниттэн Нам музыкальнай оскуолатыгар биэс сыл, 1973 сылтан Чурапчы музыкальнай оскуолатыгар 2007 сылга диэри оҕолору баян кылааһыгар үөрэппитэ. 40-ча сыл оҕолору баян уустук идэтигэр үөрэппит, саамай табыллыбыт айымньыларын наардаан «Дьэргэлгэн» диэн ырыанньыгы 2003 с. таһааттарбыта. СР суруйааччыларын союһа, «Бичик» национальнай кинигэ кыһата, «Кэскил» хаһыат 2004 с. оҕоҕо аналлаах бастыҥ уус-уран айымньыны суруйуу литературнай конкурсугар «Кэҕэ оҕото» кэпсээнэ жюри сэҥээриитин ылан, улахан саастаах оскуола оҕолоругар аналлаах «Бэлэхтээ кэрэ түгэни» кинигэҕэ киирбитэ. Петр Кобельянов улуус культурнай олоҕун сайдыытыгар народнай, духовой оркестрынан, баянист да быһыытынан элбэх үлэни ыытан кэлбитэ.
Петр Федотович санаатахха санаа кыайан тиийбэт сүдү үлэни оҥорон сахатын дьонугар хаалларбыт.
Уйбаан Александров
