Хаар сипсиэрэ
Уулусса уоттарын сырдыгар
Түһэр хаар нарыннык тэлээрэр,
Хас биирдии кыырпахха кэрэтик
Алмаас таас күлүмэ саҕыллар.
Куйаарга эргийэ үҥкүүлүү
Көҕөрөр ситимҥэ сиэттиһэ,
Хараҥа сабыытын сэргэтэ
Ийэ сир киэлитин сырдата.
Астына хаамабын ол онно
Эдэр саас кэмнэрин ахтаммын,
Ытыспар тоһуйан ылаары
Ойуутун-оһуорун сөҕөөрү.
Наҕыллык даҕаны сыыйыллар
Мөһүүрэ ардаҕы санатар,
Намыыннык даҕаны сипсийэр
Сүрэҕи үөрүүнэн толоро.
Алыптаах тыллары этэрдии
Дьиктини утары уунардыы,
Эйэргээн ыллаһа түһэрдии
Сэрэнэн куустуһан ылардыы.
Октябрина-Уйгууна
ДЬОЛЛООХ БУОЛУҤ ӨРҮҮТҮН
Халыҥ сиһи үрдүнэн
Хайыы—сах күммүт быкта,
Сүдү сүүрээн үөрүүннэн
Сүрэхпитигэр кыыста.
Бүгүн эмиэ дьоллоох күн
Бүүтэйдээтэ кууспалыы,
Тыыннаах буолбут күндүтүн
Туоһутунан айхаллыы…
Дьоһун—мааны бар дьонум
Дьоллоох буолуҥ өрүүтүн,
Халыҥ хахха удьуорум
Халыҥаатын күннээх— түүн.
Сылааһынан сыдьаайар
Саргы мичээр сүппэтин,
Сүрэхтэргэ ылаарар
Сүмэ санаа бүкпэтин.
Иллээх
кэргэн олоҕун
Иилии куустун Үрүҥ Күн,
Ойдор кэммит сорҕотун
Оһуордуоҕуҥ өрүүтүн!
Т. Шестаков – ЧОХХУРУОС
