Екатерина Кирилловна Львова – Долгууна
Сунтаар улууһун Күүкэй нэһилиэгэр
1961 сыл бэс ыйын 17 күнүгэр төрөөбүтэ. Күүкэй нэһилиэгэр олохтооҕо. Билигин пенсияҕа олорор.
Аҕабын аҕынным хоһоону 2016 сыллаахха суруйбутум.Аҕам миигин кыра оҕото буолан кыанар буолуохпуттан бэйэтин кытта илдьэ сылдьан олус элбэххэ үөрэппитэ,такайбыта.Олус тапсар этибит.Ити киниэхэ, тапталлаах аҕабар анаммыт хоһоон суруллаат ситим нөҥүө бараат да тута ырыа буолбута.Оксана Егорова – Сайынаана мелодиятыгар.
,,Сулустар,, хоһоон 2018 сыллаахха суруллубута.Эмиэ ситимҥэ бараатын кытта Гаврил Пахомов ырыа гынан таһаарбыта.
Мин кыра эрдэхпиттэн түүҥҥү халлааны,сулустары олус сөбүлүүбүн.
Онтум иэйии буолан хоһоон суруллан ырыа буолан көппүтэ.
Аҕабын аҕынным
Аҕынным даҕаны эйигин
Аастыйбыт баттахтаах аҕабын,
Суол тэлэр олоҕум ыллыгар
Суохтуубун олуһун,мэлдьитин.
Төннүөхпүн баҕардым эргитэн,
Сайыспыт сылларбын аҕалан,
Түһэххэр олоро түһүөхпүн,
Сүүспүттэн эн сыллаан ылыаххын.
Оллооҥҥо оргуппут чэйгиттэн
Оҕоҕор сойута ууруоххун,
Ол онон утахпын ханнаран
Оргууйдук сылаастык кууһуохпун.
Эрдитэр саҥаҕын истэммин
Эриһэн үлэлии сүүрүөхпүн,
Эн эрэ аттыгар буоламмын
Эстибит сылаабын кыйдыахпын.
Ааспаттар, араҕан сүппэттэр,
Ахтылҕан аалыыта буолаллар,
Кырыалар баттахпар кыттыһар
Кырдьыбыт саастарбар даҕаны.
Аҕынным даҕаны эйигин
Аастыйбыт баттахтаах аҕабын,
Суол тэлэр олоҕум ыллыгар
Суохтуубун олуһун,мэлдьитин.
Долгууна
Сунтаар
Күүкэй.
Сулустар
Хараҥа халлааҥҥа ыраахтан
Күндү таас кыырпаҕын санатан,
Ханыылыы,мичиҥнии тураллар
Күлүмнүү умайар сулустар.
Кинилэр сырдыктар,ыраастар
Киһиэхэ кэрэни саҕаллар,
Ырыаҕа,хоһооҥҥо угуйар
Ыҥырар алыпка холбууллар.
Устугас санаалыын устуһар
Кистэлэҥ күүһүнэн дабатар,
Ураты долгуну ыыталлар,
Куйаарга көтүтэн ылаллар.
Абылыыр көстүүнү туойаары,
Астыныы, дуоһуйуу ылаары ,
Абылаҥ алыбар ылларар
Айар кутум аанын аһаллар.
Долгууна Сунтаар
Күүкэй.
