Туругурдун өрүү маай!

Ыам ыйын 21 күнүгэр «Ситим» көҥүл суруйааччылар сойуустарын Чурапчытааҕы салаата ыыппыт иккис күрэһэ түмүктэннэ. Бастакы күрэс бу сыл тохсунньутугар, кыһын туһунан хоһоону айыыга анаммыта. Онно 17 киһи айбыт хоһооннорун аудиоҕа ааҕан кыттыбыттара.

Бииртэн биир үчүгэй хоһооннору уустаан-ураннаан ааҕан, ким эрэ үрдэл, сорохтор үктэл миэстэлэргэ тигистилэр. Бу сырыыга күрэспитин «Туругурдун өрүү маай» диэн ааттаатыбыт. Балаһыанньанан үс тиэмэҕэ: саас, маай уонна ньургуһун туһунан тэттик, аҕыс строкаттан элбэҕэ суох хоһооннору айан, видеоҕа устан ыыттылар.
Бу күрэскэ 21 киһи кытынна. Ол курдук, гран-при үрдүк ааты
Бүлүү улууһун Бөтүҥүттэн Кондаков Иван Иванович – Тимирхаан ылла.I степеннээх лауреат — Кудрина Мария Афанасьевна (Орто Халыма Хатыҥнааҕа).II степеннээх лауреат — Мохначевская Зоя Ксенофонтовна – Туойука (Чурапчы Хатылыта).III степеннээх лауреат — Пермяков Василий Трофимович – Татыана уола Баһылай (Чурапчы улууһа).I степеннээх дипломнт — Никитина Любовь Федотовна – Тапталаана (Дьокуускай).II степеннээх дипломант — Плотникова Елизавета Самсоновна (Дьокуускай).III степеннээх дипломант — Хабарова Анна Степановна – Айталы (Нам Тумула).Дипломунан бэлиэтэннилэр:
Игнатьева Пелагея Семеновна – Намыына, Картузова Раиса Софроновна – Дьуурал Соппуруон Кыыһа Рая, Абрамова Оксана Егоровна – Кэскилээнэ, Уарова Вера Прокопьевна, Петрова Татьяна Николаевна – Айтыына, Трофимова Любовь Петровна,
Старостина Любовь Николаевна, Михайлова Мария Титовна, Колесова Антонина Семеновна.
Анал ааттар: Окоемов Петр Петрович – Уйаны Бүөтүр, Обутова Прасковья Григорьевна – Барыс Кыай, Петрова Айталина Гаврильевна – Айталаана, Дьячковская Саргылаана Аркадьевна – СаргыЛаана, Ладина Елена Дмитриевна.

Ити курдук, дьон өссө көхтөөх буолбута уонна эр дьон кыттыбыта кэрэхсэбиллээх.
Ордук ньургуһун туһунан элбэх хоһоон айыллыбыт. Кырдьык да, саха дьоно сааһы бэлиэтиир бастакы кэрэ сибэккини олус диэн сөбүлүлээн, маанылаан хоһооҥҥо хоһуйбуттара сөхтөрөр. Чурапчыттан ордук элбэх тоҕус киһи кытынна.

Дьүүллүүр сүбэҕэ үлэлээтилэр: «Ситим» сойуус суруйааччыта Кожуров Степан Егорович – Ыстапаан Таастаах уонна Чурапчытааҕы киин библиотека ааҕааччыны кытта үлэлиир салаа сэбиэдиссэйэ Кузьмина Марфа Николаевна.
Бары кыттааччыларбытыгар өссө да элбэх ситиһиилэри уонна тус олохторугар дьолу- соргуну баҕарабыт!

Айылҕа ыһыаҕа

Саас чаҕыл халлаана халлыаҕа,
Собобут күөрэйэн ыамыаҕа,
Сэмэй уол аналын талыаҕа,
Сүрэҕэ тапталтан таалыаҕа.

Саас күлэр саһарҕам тыллыаҕа,
Симэнэ уһуктар аар тыаҕа.
Сааскы көр айылҕам ыһыаҕа
Сир үрдүн кэскиллээх тыынныаҕа.
(Кондаков Иван Иванович — Тимирхаан)

Кубаларбыт кэллилэр

Кылбаҥнаһа тунааран
Кубаларбыт кэллилэр,
Элэҥнэһэ далбаатаан
Эҕэрдэлии көттүлэр.

Айыыһыппыт киэргэлэ
Сылаас иэйии илдьитэ,
Дьаралыкпыт бэлиэтэ,
Сандал сааспыт үөрүүтэ.
(Кудрина Мария Афанасьевна)

Ньургуһунуом миэнэ

Көлүччэ уутунуу ып — ыраас,
Күп — күөх халлааны саната
Көҕөрөр мин ньургуһунуом,
Төрөөбүт дойдубар Сунтаарга.

Араҕас илгэни иҥэринэн
Алаас аайы маҥнайгынан,
Саһарар ньургуһун эрдэлээн,
Мин иккис дойдубар, Чурапчыга.
(Мохначевская Зоя Ксенофонтовна — Туойука)

Сандал саас

Сир ийэ барахсан уһуктан
Ситэн — тупсан көҕөрдө.
Сиэдэрэй ньургуһун сибэкки
Ситэрэн симээтэ кырдалы.

Сандал сааспыт эргийдэ,
Сардаҥа сырдыга сыдьаайда.
Сарыал кыыһан сандаарда.
Саргы — дьаалы салалынна.
(Пермяков Василий Трофимович — Татыана уола Баһылай)

«Ситим» сойуус Чурапчытааҕы отделын салайааччыта
Сандаар Күн Сандаара, интэриниэт хаартыската