Описание
Быйааба
(1908-1942)
Быйааба – Иван Яковлевич Назаров былыргы күүстээхтэртэн арыый кэлиҥҥи бөҕөс. Ол эрээри кини син биир былыргы
күүстээхтэргэ күүһүнэн-уоҕунан, олорон ааспыт бириэмэтинэн сөп түбэһэр. Иван Яковлевиһы Назаров – Быйааба, эбэтэр Күүстээх
Наһаарай диэн дойдутун уонна улууһун дьоно ааттыыллара. Алдан өрүс Өлүөнэҕэ түһэр төрдүттэн алта көс үөһэ, өрүс уҥа
биэрэгэр кэрэ айылҕалаах Чүүйэ диэн дойду баар. Бу дойдуга былыр-былыргыттан Наһаараптар, Үрүмээһэптэр, Хотуоһаптар
төрүттэрэ ууһаан-тэнийэн олорбуттар. Бу дьоннор бииртэн биир төрөлкөй дьон эбиттэр.
Кинилэртэн күн бүгүнүгэр диэри уос номоҕуттан түспэтэх, дьон-норуот өйүгэр үһүйээн буолан, үтүө өйдөбүлү хаалларбыт,
кэрэ кэпсээҥҥэ киирбит, аатырбыт Күүстээх Наһаарап – Быйааба бэрт бэлиэ олоҕу олорон ааспыта.
И.Я. Назаров – Быйааба 1908 сыллаахха төрөөбүтэ. Үс ини-бии этилэр. Орто уол Ньукулай – Тотоо, кыра уол Сэмэн диэн
ааттаахтара. Бу икки уолаттар эмиэ улахан күүстээх дьоннор эбиттэрэ үһү. Тотоо Аҕа дойду сэриитигэр сылдьан бааһыран
кэлбитэ, оттон кыра уол Сэмэн сэрииттэн төннүбэтэҕэ.
Быйааба оҕо эрдэҕиттэн саха былыргы курдаһан тустуутунан үлүһүйэн туран дьарыктаммыта. Элбэх албастары бэйэтэ айбыт,
чочуйбут. Улаатан, модьурҕаан истэҕин аайы үчүгэй киэптээх-таһаалаах, бухатыыр көрүҥнэнэн испит. Уҥуоҕунан ортоттон үрдүк
киһи эбит.
